ប្រជាពលរដ្ឋខែ្មរជាង២លាននាក់ បានជំពាក់បំណុលធនាគារ

ភ្នំពេញ៖ប្រជាពលរដ្ឋខែ្មរជាង២លាននាក់បានជំពាក់បំណុលធនាគារស្របពេលទ្រព្យសកម្មក្នុងវិស័យមីក្រូហិរញ្ញវត្ថុកម្ពុជាបានកើដល់១៤.៦២៦ប៊ីលានរៀល(ជាង៣៦៥០លា...

ភ្នំពេញ៖ប្រជាពលរដ្ឋខែ្មរជាង២លាននាក់បានជំពាក់បំណុលធនាគារស្របពេលទ្រព្យសកម្មក្នុងវិស័យមីក្រូហិរញ្ញវត្ថុកម្ពុជាបានកើដល់១៤.៦២៦ប៊ីលានរៀល(ជាង៣៦៥០លានដុល្លារអាមរិក) ស្មើនឹង១៨ភាគរយនៃទ្រព្យសកម្មសរុបរបស់គ្រឹះស្ថានធនាគារនាបច្ចុប្បន្ន។

សេចក្តីប្រកាសព័ត៌មានរបស់ធនាគារជាតិនៃកម្ពុជា បានបញ្ជាក់ថាវិស័យមីក្រូហិរញ្ញវត្ថុនៅកម្ពុជាកំពុងផ្តល់ឥណទានដល់ប្រជាពលរដ្ឋប្រមាណ២លាន២សែននាក់និងបានផ្តល់សេវាសន្សំដល់ប្រជាពលរដ្ឋប្រមាណ១លាន៥សែននាក់។របាយការណ៍ចេញផ្សាយកាលពីចុងខែមេសាបាននិយាយថាវិស័យមីក្រូហិរញ្ញវត្ថុមានការរីកចម្រើនយ៉ាងឆាប់រហ័សនិងមានការទទួលស្គាល់ជាលក្ខណៈជាតិនិងអន្តរជាតិដែលរួមចំណែកដល់ការកាត់បន្ថយភាពក្រីក្រនៅកម្ពុជា និងគាំទ្រកំណើនសេដ្ឋកិច្ចជាតិ។វិស័យមីក្រូហិរញ្ញវត្ថុនៅកម្ពុជាបានចាប់ផ្តើមសកម្មភាពដំបូងនៅក្នុងដើមទសវត្សរ៍៩០ដោយកើតឡើងជារូបភាពអង្គការក្រៅរដ្ឋាភិបាល ក្នុងការដើរតួនាទីប្រតិបត្តិករមីក្រូហិរញ្ញវត្ថុដើម្បីអភិវឌ្ឍន៍គ្រួសារនៅតាមមូលដ្ឋាន។

ធនាគារជាតិនៃកម្ពុជាបានប្រកាសថាវិស័យមីក្រូហិរញ្ញវត្ថុរបស់កម្ពុជា ក៏ប្រឈមនឹងការកើនឡើងនៃហានិភ័យផងដែរដោយសារទំហំ និងបណ្តាញនៃវិស័យនេះបានកើនឡើងជាលំដាប់ស្របតាមវឌ្ឍនភាពនៃសេដ្ឋកិច្ចកម្ពុជា។លោក ជា សិរិ អគ្គនាយកបច្ចេកទេសធនាគារជាតិនៃកម្ពុជា បានថ្លែងនៅក្នុងសេចក្តីប្រកាសព័ត៌មានថាដើម្បីគ្រប់គ្រងហានិភ័យ និងគាំទ្រការអភិវឌ្ឍវិស័យមីក្រូហិរញ្ញវត្ថុ ធនាគារជាតិនៃកម្ពុជា បានពង្រឹងជាប្រចាំលើក្របខណ្ឌច្បាប់ និងបទប្បញ្ញត្តិ ព្រមទាំងការត្រួតពិនិត្យលើវិស័យនេះ។ លោកជាសិរិបានបន្តការបន្តរក្សាបាននូវស្ថិរភាពនៃការអភិវឌ្ឍវិស័យមីក្រូហិរញ្ញវត្ថុគឺមានសារៈសំខាន់ណាស់ក្នុងការរួមចំណែករក្សាស្ថិរភាពហិរញ្ញវត្ថុនិងការគាំទ្រការរីកចម្រើនសកម្មភាពសេដ្ឋកិច្ចនានា ជាពិសេសចំពោះសហគ្រាសធុនតូចនិងមធ្យមនិងប្រជាជនក្រ។

សេចក្តីប្រកាសព័ត៌មានបានឲ្យដឹងថាធនាគារជាតិនៃកម្ពុជានឹងរៀបចំសន្និសីទម៉ាក្រូសេដ្ឋកិច្ចប្រចាំឆ្នាំ២០១៦និងការទទួលយកសំណើស្រាវជ្រាវ ដើម្បីទទួលធាតុចូលបន្ថែមឲ្យបានគ្រប់ជ្រុងជ្រោយ សម្រាប់បន្តពង្រឹងស្ថិរភាពនិងការអភិវឌ្ឍវិស័យមីក្រូហិរញ្ញវត្ថុកម្ពុជាឲ្យកាន់តែមានភាពរឹងមាំ និងប្រកបដោយចីរភាព។គិតមកទល់បច្ចុប្បន្នមានគ្រឹះស្ថានមីក្រូហរិញ្ញវត្ថុចំនួន៤០អង្គភាព និងអង្គការផ្តល់សេវាកម្មប្រាក់កម្ចីចំនួន៧ផ្សេងទៀត នេះបើយោងតាមទិន្នន័យពីសមាគមមីក្រូហិរញ្ញវត្ថុកម្ពុជា។គិតត្រឹមរយៈពេល៩ខែ ឆ្នាំ២០១៥ គ្រឹះស្ថានមីក្រូហរិញ្ញវត្ថុទាំងនេះ បានផ្តល់ប្រាក់កម្ចីដល់ប្រជាពលរដ្ឋចំនួន២៧២១លានដុល្លារអាមេរិក កើនឡើង៣៤ភាគរយបើធៀបរយៈពេលដូចគ្នាកាលពីឆ្នាំ២០១៤ ដែលមានទឹកប្រាក់ត្រឹម២០២៨លានដុល្លារ។ការផ្តល់កម្ចីភាគច្រើនទៅលើវិស័យកសិកម្ម អាជីវកម្មខ្នាតតូច សំណង់ និងការប្រើប្រាស់ផ្ទាល់ខ្លួន។ ចំណែកបញ្ញើវិញ ទទួលបាន១២៤១លានដុល្លារ កើនឡើង៣៨ភាគរយ បើធៀបកាលពីចុងឆ្នាំ២០១៤ ក្នុងតម្លៃទឹកប្រាក់៨៩៧លានដុល្លារ៕

 

ប្រភព៖ Todaykh